სიახლეების გამოწერა

25 მაისს, სოფელ ასურეთში მდებარე ე. წ. ,,სხვავას“ საფეხბურთო მოედანზე, ,,მოყვარულთა თასი 2019“ -ის მუნიციპალური თამაშების პირველი ეტაპი გაიმართა, რომელშიც მონაწილეობა მიიღეს ჭივჭავის, ხაიშის, გოლთეთის, კოდის, ირაგის, სამღერეთის, ასურეთის და ორბეთის საფეხბურთო გუნდებმა. შეჯიბრის მეორე ეტაპზე, რომელიც ივნისის თვეში გაიმართება, ასპარეზობას განაგრძობენ წინწყაროს, ხაიშის, გოლთეთის, კოდის და ასურეთის გუნდები.

ტურნირს, თეთრიწყაროს მუნიციპალიტეტის მერი გიორგი ქორიძე, მერის მოადგილე ბერდია ხვისტანი, მერიის ჯანდაცვისა და სოციალური უზრუნველყოფის, განათლების, კულტურის, სპორტისა და ახალგაზრდულ საქმეთა სამსახურის უფროსი ვაჟა სულხანიშვილი და ა.ა.ი.პ. თეთრიწყაროს სპორტული სკოლის დირექტორი ზურაბ ბაბლუანი დაესწრნენ.

სამოყვარულო დიდ ფეხბურთში „მოყვარულთა თასის“ გათამაშებას ახორციელებს საქართველოს სამოყვარულო ფეხბურთის ასოციაცია და საქართველოს ფეხბურთის ფედერაცია, ქართული ფეხბურთის განვითარების ფონდთან და თეთრიწყაროს მუნიციპალიტეტის მერიასთან თანამშრომლობით, 
„მოყვარულთა თასი 2019“ სამ ეტაპად ჩატარდება - მუნიციპალური, რეგიონალური და ფინალური.
„მოყვარულთა თასი“ არის ოფიციალური სამოყვარულო საფეხბურთო ჩემპიონატი, რომელიც იმართება მთელი ქვეყნის მასშტაბით და აღიარებულია ევროპული ფეხბურთის მმართველი ორგანოს - UEFA-ს მიერ. 

ჩემპიონატის მიზნებია: ფეხბურთის მასობრიობის გაზრდა; მთელი ქვეყნის მასშტაბით სამოყვარულო საფეხბურთო ლიგების ორგანიზება; ჯანსაღი ცხოვრების წესის დამკვიდრება და პოპულარიზაცია საზოგადოებაში; ნიჭიერი ახალგაზრდა ფეხბურთელების აღმოჩენა; სპორტული ინფრასტრუქტურის აღდგენა; ვეტერანი ფეხბურთელების დაბრუნება ფეხბურთში; დამწყები მწვრთნელებისა და მსაჯების პროფესიული განვითარების ხელშეწყობა.