სიახლეების გამოწერა

22 ივლისს თეთრიწყაროს მუნიციპალიტეტის სააქტო დარბაზში თეთრიწყაროს მუნიციპალიტეტის გამგებელი ბესიკ წიკლაური პროგრამა „საქართველოს მოხალისე“-ს წევრებს შეხვდა. 
პროგრამა ხორციელდება საქართველოს სპორტისა და ახალგაზრდობის სამინისტროს მიერ და მიზნად ისახავს საქართველოში მოხალისეობის ინსტიტუტის გაძლიერებას, მოხალისეთა ერთიანი ქსელის შექმნას, ახალგაზრდებში სამოქალაქო ცნობიერების ამაღლებას, მოხალისეობის პოპულარიზაციას და ახალგაზრდებში საკუთარი ნების საფუძველზე უანგარო შრომის იდეის პოპულარიზაციას. 
მონაწილეებმა გამგებელს გააცნეს პროგრამის მიზნები და ისაუბრეს თეთრიწყაროს მუნიციპალიტეტში სამომავლოდ დაგეგმილი ღონისძიებების შესახებ. ბესიკ წიკლაური საზოგადოებისათვის სასარგებლო აქტივობების და პროგრამის მიზნების წარმატებით განხორციელებისათვის მონაწილეებს მხარდაჭერას დაპირდა.
პროგრამის ფარგლებში საქართველოს მოხალისე შეიძლება გახდეს ნებისმიერი დაინტერესებული ახალგაზრდა, რომლებიც თავისუფალი დროის, ცოდნისა და უნარების გამოყენებით, თავიანთ წვლილს შეიტანენ საზოგადოებისათვის სასარგებლო საქმიანობის განხორციელებაში და ადგილობრივი მუნიციპალიტეტის საჭიროებიდან გამომდინარე რეგიონებში განახორციელებენ ისეთ ინიციატივებს როგორიცაა: მოხალისეთა კლუბის შექმნა, გარემოს დაცვითი ღონისძიებები, საქველმოქმედო საქმიანობა - სხვადასხვა საჭიროებების მქონე ადამიანების დახმარება, ფილმების ჩვენება, უცხო ენის კურსების გამართვა, ცხოვრების ჯანსაღი წესის პოპულარიზაცია (სპორტული შეჯიბრებები, მარათონები), შშმ ბავშვების ინტეგრაცია, ღირსშესანიშნავი თარიღების აღნიშვნა, შემოქმედებითი საღამოების გამართვა, ცნობილ ადამიანებთან შეხვედრები და სხვა.