სიახლეების გამოწერა

2015 წლის 15 სექტემბერს თეთრიწყაროს მუნიციპალიტეტში დაიწყო ივანე ჯავახიშვილის სახელობის თბილისის სახელმწიფო უნივერსიტეტის მიერ შემუშავებული პროექტის - „საქართველოს ეროვნული უმცირესობებით დასახლებულ რეგიონებში ქართული ენის დაჩქარებული მეთოდით სწავლების პროგრამა - ვისწავლოთ ქართული“-ს განხორციელება.

პროექტი დაფინანსებული იყო საქართველოს პრეზიდენტის სარეზერვო ფონდის მიერ და ითვალისწინებდა საქართველოს ეროვნული უმცირესობებით კომპაქტურად დასახლებულ რეგიონებში ქართული ენის დაჩქარებული მეთოდით სწავლებას. პროგრამა განხორციელდა თეთრიწყაროს მუნიციპალიტეტის ეთნიკური უმცირესობებით დასახლებულ შემდეგ სოფლებში: სოფელი ქოლასარში (235 კომლი, ეთნიკური აზერბაიჯანელები) და სოფელ სამშვილდეში (148 კომლი, ეთნიკური სომხები). სწავლების მსურველთა ასაკი განისაზღვრა 16-დან 75 წლამდე. ქართული ენის დაჩქარებული მეთოდით სწავლების სურვილი გამოთქვა ქოსალარში მცხოვრებმა 60 მოქალაქემ, ხოლო სოფელ სამშვილდეში 20 მოქალაქემ. სწავლებას ადგილზე წარმართავდნენ უნივერსიტეტის თანამშრომლები. სასწავლო კურსი 3 თვიანი იყო და 2015 წლის 15 დეკემბერს დასრულდა. 
მიმდინარე წლის 28 დეკემბერს საქართველოს პრეზიდენტის სასახლეში პრეზიდენტის მრჩეველმა ეთნიკური უმცირესობების საკითხებში სოფიო შამანიდი სხვადასხვა რეგიონებიდან ჩამოსულ პროექტის მონაწილეებს შეხვდა, საპრეზიდენტო პროგრამის მეორე ეტაპის დასრულება შეაჯამა და პროექტის მონაწილეებს სერთიფიკატები გადასცა.
შეხვედრაზე მიწვეული იყო თეთრიწყაროს მუნიციპალიტეტის გამგებელი ბესიკ წიკლაური, პროექტის რეგიონული კოორდინატორები, თბილისის სახელმწიფო უნივერსიტეტის და სამცხე-ჯავახეთის სახელმწიფო უნივერსიტეტის პროფესორ-მასწავლებლები, რომლებმაც პროექტის გაგრძელება დადებითად შეაფასეს და მის საჭიროებაზე ისაუბრეს.
აღნიშნული პროექტის მეორე ეტაპი სამცხე-ჯავახეთის, ქვემო ქართლისა და კახეთის რეგიონებში განხორციელდა. მსმენელთა რაოდენობამ კი, 1700 გადააჭარბა.
აღნიშნული პროგრამის განხორციელება მნიშვნელოვანი იყო თეთრიწყაროს მუნიციპალიტეტის ეროვნული უმცირესობებით კომპაქტურად დასახლებულ დასახლებებში, ვინაიდან მოსახლეობის დიდი ნაწილი არ ფლობს სრულყოფილად საქართველოს სახელმწიფო ენას. ქართული ენის სწავლების მიმართულებით, სხვადასხვა სასწავლო პროგრამების განხორციელება საზოგადოებაში მათი სრულყოფილი ინტეგრაციის მნიშვნელოვან წინაპირობას წარმოადგენს.
პროექტი „ვისწავლოთ ქართული“ გაზაფხულზე განახლებული სახით გაგრძელდება და მას ქართული ენის შესწავლასთან ერთად კონსტიტუციის თეზისების შესწავლის კომპონენტიც დაემეტება.