სიახლეების გამოწერა

12 აგვისტოს დიდგორის სახელოვანი ბრძოლის 895-ე წლისთავი აღინიშნება. 
1121 წელს მეფე დავით აღმაშენებელმა გადამწყვეტ ბრძოლაში, თურქ-სელჩუკთა მრავალრიცხოვანი არმია დაამარცხა და ბრწყინვალე გამარჯვება მოიპოვა, რომელსაც ისტორიკოსებმა „ძლევაი საკვირველი“ უწოდეს.
დიდგორის ბრძოლას ქართველთა მრავალსაუკუნოვან ისტორიაში გამორჩეული ადგილი უკავია. მეფე დავით აღმაშენებლის გონივრული სამხედრო სტრატეგიის წყალობით, დიდგორი დამოუკიდებლობისათვის და თავისუფლებისათვის ბრძოლის, ერთიანობის და ქვეყნისათვის თავდადების სიმბოლოდ იქცა. სწორედ დიდგორის გამარჯვებამ მისცა დასაბამი ქვეყნის საბოლოო განთავისუფლებას და გაერთიანებას, საქართველომ საბოლოოდ დაიმკვიდრა რეგიონის უძლიერესი სახელმწიფოს სახელი. 
 ქართველი ერი ყოველთვის მოწიწებით იხსენიებს დიდგორის გმირებს, სათანადო პატივს მიაგებს სამშობლოსათვის დაღუპული მამულიშვილების ხსოვნას და ყოველ წელს ზეიმობს დიდგორობას.
როგორც გასულ წელს, დიდგორობა ცენტრალური და ადგილობრივი ხელისუფლების ერთობლივი ძალისხმევით, წელსაც მაღალ სახელმწიფოებრივ დონეზე აღინიშნება და დატვირთული იქნება სხვადასხვა კულტურული ღონისძიებებით. სპეციალურად შემუშავებული სცენარის მიხედვით, დამსწრე საზოგადოების წინაშე წარსდგებიან სახელმწიფო და ადგილობრივი ანსამბლები ქორეოგრაფიული და მუსიკალური ნომრებით, მოეწყობა საგამოფენო კუთხეები, გაიმართება ტრადიციული ჭიდაობა, დოღი და სხვა სახალხო შეჯიბრებები. მოხდება დაჯილდოვება, სახელმწიფო ჯილდო - დიდგორის ჯვრის ორდენი გადაეცემათ სამხედრო პირებს გამოჩენილი მამაცობისათვის. 
ღონისძიებას დაესწრებიან საქართველოს მთავრობის წარმომადგენლები, მაღალი პოლიტიკური თანამდებობის პირები, მოწვეული სტუმრები და მოსახლეობა.
ღონისძიება დაიწყება 12 აგვისტოს 10 საათზე. 
გთხოვთ მობრძანდეთ!
პატივისცემით: თეთრიწყაროს თვითმმართველობა.