სიახლეების გამოწერა

 13 სექტემბერს თეთრიწყაროს მუნიციპალიტეტის გამგებელი ბესიკ წიკლაური სოფელ კლდეისში ადგილობრივ მოსახლეობას შეხვდა. შეხვედრის მიზანს სოფელ კლდეისამდე სტიქიის შედეგად დაზიანებული მისასვლელი საავტომობილო გზის რეაბილიტაციის საკითხი წარმოადგენდა. სტიქიის შედეგების სალიკვიდაციოდ საქართველოს მთავრობის 2016 წლის 7 ივლისის განკარგულების საფუძველზე, თეთრიწყაროს მუნიციპალიტეტისთვის გამოყოფილი თანხით განისაზღვრა სოფელ კლდეისში მისასვლელი გზის, სოფელ ახალსოფელში მისასვლელი გზის და სოფელ ვაშლოვანში შიდა გზების რეაბილიტაცია. ამ ეტაპზე მიმდინარეობს საპროექტო დოკუმენტაციის მომზადება, ხოლო შემდგომ გამოცხადდება ტენდერი სამუშაოებზე. გამგებელმა მოსახლეობას პროექტის შედგენის პროცესში ჩართულობისაკენ მოუწოდა რათა მაქსიმალურად იქნეს გათვალისწინებული მათი ინტერესები. შეხვედრა სხვადასხვა აქტუალური საკითხების განხილვით გაგრძელდა, სოფელში სადაც 22 ადგილობრივი ცხოვრობს, მოსახლეობის ძირითად ნაწილს მოხუცები, მარტოხელა და სოციალურად დაუცველი ოჯახები წარმოადგენს. ბესიკ წიკლაური გამგეობის კომპეტენციის ფარგლებში მოსახლეობას სხვადასხვა სოციალური პრობლემების მოგვარებაში დახმარებას დაპირდა.